Á fimmtudaginn, 14. maí, verður síðasti fimmtudagsfyrirlestur vetrarins. Að þessu sinni er það Hermann Stefánsson bókmenntafræðingur sem flytur erindi sem hann kallar "Rými í mynd". Fyrirlesturinn fer að venju fram í gamla Húsmæðraskólanum við Þórunnarstræti og hefst kl 17:00.
Í erindinu ræðir Hermann Stefánsson, rithöfundur og bókmenntafræðingur, um fréttaljósmyndir í dagblöðum og les í merkingu þeirra, allt frá myndum af þjóðhöfðingjum heimsins og Íslands, sem virðast einfaldar andlitsmyndir við fyrstu sýn, til myndanna með fréttunum af Britney Spears og mynda af Búsáhaldabyltingunni.
Hugað verður að fagurfræðinni sem fréttaljósmyndum fylgja og því velt upp hvernig ljósmyndun er alltaf pólitískt athæfi. Fjallað verður um tengsl orða og mynda og hvernig fréttin er sögð með myndinni.
Mynd er aldrei bara mynd, mynd er morð, mynd er aftaka.
Sjáumst, Stjórnin.
