þriðjudagur 20.apríl 2010 - Stjórn Akureyrarakademíunnar
Á fimmtudagin, sumardaginn fyrsta, flytur Margrét Guðmundsdóttir, sagnfræðingur, erindi í fyrirlestraröð Akademíunnar en erindið nefnir hún
"Mótun fagstéttar: Fyrsta kynslóð faglærðra hjúkrunarkvenna á Íslandi".
Fyrirlesturinn fer fram í gamla Húsmæðraskólanum og hefst kl. 17:00.
Að fyrirlestrinum loknum notum við tækifærið og fögnum sumarkomunni með ljúfum veitingum og sólskini!
Fyrstu hjúkrunarkonurnar sem stundað höfðu skipulagt nám í hjúkrun hófu störf á Íslandi í lok 19. aldar. Þær voru erlendar en um og eftir aldamótin fóru fáeinar íslenskar konur utan í hjúkrunarnám. Á þriðja áratugnum byggðu hjúkrunarkonur upp nám í hjúkrunarfræði hér á landi.
Í erindinu verður sjónum beint að þeim konum sem fyrstar gripu tækifærið til að afla sér hjúkrunarmenntunar á Íslandi. Fjallað verður um bakgrunn þeirra, uppruna og nám en megináhersla verður lögð á að varpa ljósi á félagsmótun stéttarinnar.
Margrét Guðmundsdóttir er sagnfræðingur að mennt og er kvennasaga hennar sérsvið. Unanfarin ár hefur Margrét unnið að rannsókn á sögu hjúkrunar á Íslandi og er bók þess efnis væntanleg frá henni innan skamms.
