Á fimmtudaginn, þann 11 febrúar, mun Dr. Ingibjörg Ágústsdóttir, bókmenntafræðingur flytja erindi í fyrirlestraröð Akademíunnar. Erindið nefnir hún "Fortíðin í spegli nútímans: Þrjár drottningar Tudor tímabilsins í breskum nútímabókmenntum, sjónvarpsþáttum og kvikmyndum".
Fyrirlesturinn hefst kl. 17:00 og er öllum opinn.
Fyrirlesturinn fjallar um túlkun breskra nútímabókmennta, kvikmynda og sjónvarpsþátta á sögu þriggja drottninga sem settu svip sinn á Tudor tímabilið svokallaða, fóru með völd um lengri eða skemmri tíma, og sem allar er hægt að túlka sem fórnarlömb. Þær eru Anna Boleyn, önnur eiginkona Hinriks áttunda, Lady Jane Grey, eða "níu daga drottningin", og María Stúart Skotadrottning.
Teknar verða fyrir þrjár nýlegar skáldsögur eftir kvenkyns rithöfunda sem byggja á sögu þessara kvenna og einnig verður fjallað lítilsháttar um kvikmyndir og sjónvarpsþætti sem byggja á þessu tímabili í breskri sögu. Leitast verður við að svara því hvað það er sem gerir þetta tímabil svo vinsælt, hvort og þá hvernig sögulegum staðreyndum sé fórnað til að höfða betur til lesenda/áhorfenda og hverjar séu birtingarmyndir kvenfrelsisviðhorfa nútímans í þessum skáldsögum og kvikmyndum.
