fimmtudagur 12.janúar 2012 - Pétur Björgvin - Lestrar 14
Undanfarið hefur Sigurgeir Guðjónsson stundað doktorsnám í sagnfræði við Háskóla Íslands. Rannsóknin hefur vinnutitilinn, Saga geðveikra og geðheilbrigðismál á Íslandi frá 1834-1910. Rannsóknin snýr að því að kanna aðstæður geðveikra á Íslandi og skýra breytingar sem urðu á högum þeirra með breyttum samfélagsháttum á 19. öld og fram á fyrstu starfsár Kleppsspítala. (Stofnaður 1907). Lýðfræðileg athugun er gerð á geðveikum á grundvelli manntala og annarra tölfræðigagna og kannaður fjöldi þeirra, samsetning og félagslegar aðstæður. Opinber stefna og aðgerðir í geðheilbrigðismálum er annar mikilvægur hluti rannsóknarinnar. (Upphafið er miðað við fátækralöggjöfina árið 1834). Tilurð nútímageðlækninga á Íslandi á seinni hluta 19. aldar og uppbygging opinberrar læknisþjónustu á þessu sviði verður skoðuð. Þar koma hugmyndir almennings einnig
við sögu. Í þessu erindi er ætlunin að segja frá því hvaða hugmyndir koma fram um geðveiki hjá almenningi á 19. öld. Stuðst er við ýmsar heimildir, þjóðsögur, munnmæli, bréfasöfn , æviminningar og lækningabækur. Reynt verður að varpa ljósi á hugmyndirnar með mið af eftirfarandi
spurningum:
Hvernig var geðveiki lýst?
Hvað orsakaði geðveiki?
Hvernig var geðveiki meðhöndluð?
Hér á vefnum má nálgast bækling með upplýsingum um fyrirlestraröð vetrarins sem og veggspjald.
