AkureyrarAkademían

Fimmtudaginn 26. janúar kl. 17:00 heldur Andrea Hjálmsdóttir, félagsfræðingur og lektor við Háskólann á Akureyri fyrirlestur í húsnæði AkureyrarAkademíunnar, gamla Húsmæðraskólanum við Þórunnarstræti 99. Fyrirlesturinn hefst kl. 17:00, allir velkomnir og heitt á könnunni. Viðburðurinn er hluti af fyrirlestraröð AkureyrarAkademíunnar.

Íslenskar konur hafa löngum verið mjög virkar á vinnumarkaði. Þrátt fyrir það virðist framlegð þeirra liggja í skuggum samfélagsins. Hér eru kynntar niðurstöður viðtalsrannsóknar sem gerð var á meðal kvenna sem unnu á Verksmiðjunum á Akureyri um miðja síðustu öld. Rannsóknargögnin gáfu ótvírætt til kynna að seinni vakt kvenna á Verksmiðjunum (en konur með fjölskyldu unnu gjarnan á kvöldvöktum) endurspegli ‘seinni vakt’ kvenna enn í dag. Líkt og konurnar á Verksmiðjunum um og eftir miðja síðustu öld, vinnur hin íslenska samtímakona á tveimur vöktum, heima og heiman. Í máli kvennanna kom fram, í samræmi við væntingar og orðræðu um miðja síðustu öld, að sjálfsmynd verksmiðjukvennanna tengdist fremur heimilinu en vinnunni. Vinnusjálf þeirra var dulið í skugga heimilisins. Í rannsókninni spegla konur í fortíð konur í nútíð. Greining á reynslu og upplifun verksmiðjukvennanna gefur til kynna að hin pólitíska rétthugsun nútímans hafi sökkt hinum kynbundna veruleika í kviksyndi sem erfitt reynist að skoða og bregðast við. Ætla má að sú orðræða, sem byggir á hugmyndum um að jafnrétti hafi verið náð, sé fremur hluti bakslags í jafnréttisbaráttu en framþróunar.

Hefur þú endurnýjað félagsskráningu þína árið 2011? Eða vilt þú ganga í félagið? Endilega skráðu þig hér.