Fimmtudaginn 8. október næstkomandi kl. 17:00 heldur Tryggvi Hallgrímsson, félagsfræðingur, erindi í AkureyrarAkademíunni (gamla Húsmæðraskólanum). Erindið sem nefnist ,,Staða kynjanna í kreppunni - samtal um jafnréttismál" er hluti af fyrirlestrarröð akademíunnar 2009 til 2010. Að erindi loknu er boðið upp á samtal yfir kaffibolla. Allir eru velkomnir og þátttaka ókeypis.
Ásta Ragnheiður Jóhannesdóttir fyrrum félags- og tryggingamálaráðherra skipaði, í ársbyrjun 2009, vinnuhóp um áhrif efnahagsbreytinga á stöðu kynjanna. Vinnuhópurinn skilaði áfangaskýrslu í lok mars þar sem tilgreindir eru málaflokkar og svið sem sérstaklega þarf að gaumgæfa.
Í erindi sínu mun Tryggvi Hallgrímsson, félagsfræðingur, gera grein fyrir niðurstöðum vinnuhópsins og kynna aðferðafræði kynjasamþættingar með áherslu á afleiðingar kreppunnar.
Kynjasamþætting er skilgreind í orðskýringum jafnréttislaga sem leið til „[a]ð skipuleggja, bæta, þróa og leggja mat á stefnumótunarferli þannig að sjónarhorn kynjajafnréttis sé á öllum sviðum fléttað inn í stefnumótun og ákvarðanir þeirra sem alla jafna taka þátt í stefnumótun í samfélaginu.“
