Fimmtudaginn 26. nóvember kl. 17:00 flytur Hermann Óskarsson, félagsfræðingur erindi sem nefnist Upphaf og þróun markaðsþjóðfélags við innanverðan Eyjafjörð. Erindið er hluti af fimmtudagsfyrirlestrum Akademíunnar. Aðgangur er ókeypis, allir eru velkomnir og hvattir til að taka þátt í umræðum að loknum fyrirlestrinum, bæði í fyrirlestrarsal sem og yfir kaffi og meðlæti þar á eftir.
Fyrirlesari dagsins, Hermann Óskarsson er félagsfræðingur að mennt og starfar sem dósent við heilbrigðisvísindasvið Háskólans á Akureyri. Hann lauk Fil. Kand. prófi 1980 í félagsfræði, þjóðhagfræði og mannfræði frá Háskólanum í Gautaborg og doktorsprófi í félagsfræði frá sama skóla 1996. Þá lauk Hermann einnig prófi í uppeldis- og kennslufræðum til kennsluréttinda 1989 frá Kennaraháskóla Íslands. Doktorsritgerð hans fjallaði um upphaf og þróun stéttaskiptingar og stjórnmála á Akureyri frá 1860-1940.
Í erindi sínu mun Hermann m.a. fjalla um þróun atvinnulífs á Akureyri í ljósi upplýsinga manntala. Þar kemur fram hvernig markaðsþjóðfélag óx fram í sjálfsþurftasamfélagi norðlenskra bænda, en þetta samfélagsform varð að lokum megineinkenni íslensks þjóðfélags á síðari hluta 20. aldar.
Með orðinu markaðsþjóðfélag er almennt átt við þjóðfélag sem einkennist af þróaðri verkaskiptingu og vettvangi fyrir framboð og eftirspurn vöru og þjónustu. Slíkt staðbundið markaðssamfélag myndaðist á Akureyri á löngum tíma frá miðri 16. öld. Samsvarandi þróun á nokkrum þéttbýlisstöðum (sjávarplássum) í landingu lagði grunn að markaðsþjóðfélagi samtímans.
Þrjú tímabil eru sérstaklega mikilvæg frá sjónarhóli markaðssamfélags og íbúaþróunar á Akureyri, sem tengjast því að erlendir kaupmenn fengu heimild til fastrar búsetu, að breytingar urðu í landbúnaði og að fiskveiðar urðu að sannkallaðri stóriðju í lok 19. aldar og í upphafi þeirrar 20. Árið 1785 voru íbúar Akureyrar 12 talsins, en 215 árum síðar voru þeir orðnir rúmlega 15 þúsund.
